عن الدستور سألوني ..

عن الدستور سألوني ..

التغيير حاجة جميلة جداً خصوصاً لما يكون تغيير جلد .. و تغيير أسلوب الكتابة من لغة عربية فصحى جامدة صلبة منفرة للغة عامية قريبة من القلب شيء جميل و مشجع على القراءة

كمان تغيير الملابس من صيفي لشتوي و العكس و من قميص لتي شيرت و من بدلة لجاكت و من بنطلون لشورت .. كل ده جميل و لذيذ و ابن حلال مصفي

فاضل تغيير الحالة المزاجية بعد ما غيرنا أسلوب الكتابة و غيرنا الهدوم بس المشكلة إن الهدوم و الكتابة شيء في إيدينا نقدر نقلع و نلبس و خلوا بالكم من كلمة نلبس لإننا ساعات بنلبس و ما نقدرش نقلع و ساعات بنلبس و احنا لابسين .. أهو زيادة الخير خيرين .. و الكتابة نقدر نغيرها بسهولة حتى لو حبينا نكتب بلغة الماو ماو ممكن نتعلمها و نكتب بيها لكن تغيير الحالة المزاجية من قرف و يأس و إحباط و تشاؤم و رفض للحياة .. إلى عكس كل ده شيء مش سهل و تقريباً شبه مستحيل تغييره بإيدينا .. و زي ما إيدينا عاجزة عن التغيير كمان ما لهاش ذنب في وصولنا للحالة دي

الدستور المصري قالوا هيغيروه .. طيب ما هو جميل جداً انه يتغير و هي الناس معترضة ليه على تغييره هو التغيير وحش ؟

بالعكس التغيير جميل للي عايش فيه .. و الدستور في لغة العامية هو التنبيه لما يكون الواحد داخل بيت فيه حريم و خايف عينه الطاهرة تقع على حرمة منهم يقوم يشيل ذنب عدم غض البصر و مين عارف يمكن تحصل نظرة فابتسامة فسلام فكلام فموعد فلقاء و على القاريء أن يعذرني في عدم تنوين الكلام لأني قرفان حبتين

و لما كنا بنتكلم بالبلدي فلازم كمان نقول الدستور بالبلدي و قد سبق شرحه .. نرجع بأه لدستور البلد اللي هو مش بالبلدي لا ده باللغة الفصحى و الدستور ده يختلف عن الدستور بتاع نظرة فابتسامة لان دستور البلد هو القاعدة بتاعتها .. عمركو شفتو بلد من غير قاعدة ؟

طيب المسئولين تفضلوا مشكورين و أعلنوا إنهم هيغيروا الدستور .. و انا شخصيا عرفت بالصدفة - أيو الله بالصدفة - إن عدد المواد اللي هيغيروها في الدستور 34 مادة .. و قالوا كمان إن المواد اللي هتتغير هتتعرض على الشعب قبل ما تتغير عشان الناس تقول رأيها في التغيير .. و بصرف النظر شوية عن حكاية رأي الناس اللي هي مشغولة بترتيب الأهلي في الدوري و فاضل له كام نقطة عشان ياخد الدرع الميمون بتاع الدوري و ناس تانية مشغولة بأسعار الفراخ اللي أصبحت زائر عزيز على موائد المصريين و ناس تالتة مشغولة بقروض البنوك اللي بقت متاحة لكل مين هب و دب بس المهم ما يكونش من محدودي الدخل يعني لا يقل مرتبه عن 1200 جنيه و ناس رابعة عايزة تتجوز و مش عارفة و ناس خامسة متجوزة و عايزة تنفصل و مش عارفة و ناس خامسة مش لاقية تاكل من أصله و ناس سادسة عايشة في رعب بسبب إنهم بيشتغلوا في قطاع خاص و قانون العمل الجديد الله يعمر بيته بيخول صاحب العمل إنه يبيع و يشتري في العمالة اللي عنده و يرفد و يعين و يلعب معاهم بالبيضة و الحجر و لا حد يقدر يقول له تلت التلاتة كام و ناس سابعة لسة عايشة في إشتغالة أكياس الدم المغشوشة و متابعاها عن كثب و ناس تامنة ثائرة و وشها أحمر و صوتها عالي عشان مذبحة الأسرى المصريين و ناس بتصرخ من أسعار الشقق و إيجارات المحلات و ناس بتصوت من أسعار مواد البناء و ناس بتلطم من الأمراض المزمنة

الناس بقت بتشحت من بعضها و الشحات بيختار أفقر ناس عشان يشحت منهم .. تلاقي الشحات من دول راح طالع أوتوبيس أو مترو و هو ماسك ورقة و يقولك أنا عندي شلل أطفال و مش لاقي أتعالج و اللي عنده فشل كلوي و اللي عنده الكبد و خد من المنقي خيار طول ما انت خارج البيت .. الله .. طيب ما هو اللي انت بتشحت منهم دول يا عم يا شحات كل واحد فيهم بيتمنى يشحت زيك ده إذا كان مش شحات زيك بالفعل .. ثم الفساد بتاع درج الموظفين اللي بيتفتح عشان طالب الخدمة يتبرع فيه بالشاي بتاع الموظف اللي هو كمان بدوره هيتبرع و يخلصلك ورقك ده سببه إيه ؟ ده سببه إن الموظف مش لاقي ياكل و لا يأكل أولاده و لا يعيشهم و لا يعلمهم و لا يلبسهم و لا يعالجهم .. مش هقولك انه عايز يصيف مثلاً أو عايز يخرج خروجة جامدة هو و المدام و الأولاد و يقعدوا على قهوة الفيشاوي في الحسين و الراجل يدفع نص مرتبه في اتنين شاي و واحد سحلب و شيشة مشروبة قبل كده

المدرس الوحش الشرير اللي بيدي دروس خصوصية و كمان بيدفع العيال عشان ياخدوها بيعمل كده ليه ؟ ما هو الراجل مش لاقي ياكل يا اخواننا و محتاج فلوس عشان يعيش زي بقية العالم ما هي عايشة .. هو كون الإنسان يمتلك سيارة و شقة واسعة و رصيد في البنك و وظيفة محترمة و يقدر يشتري اللي بيتمناه و يقدر يسافر في رحلات سياحية داخل أو خارج البلد ده يسموه إيه .. ترف .. رفاهية .. أهو الترف و الرفاهية دول من أبسط حقوق الإنسان عشان يقدر هذا الإنسان ينتج و يعيش و يكون كامل الأهلية و الشخصية .. إذا الإنسان ما لاقاش العلاج المناسب لأمراضه هتكبر و تزيد و تبقى كوارث .. إذا ما عرفش يعلم أولاده تعليم محترم هيبقوا حرامية و نصابين و قطاع طرق و متحرشين بالنساء إذا ما عرفش يتجوز هيزني و ينحرف و يدور له على واحدة يقف معاها على كورنيش النيل و يركبوا مع بعض الأوتوبيس المكيف

نرجع للدستور تاني .. السادة المسئولين قالوا هيغيروه لكن لا قالوا إيه هي المواد اللي هتتغير و لا إيه هو التغيير و لا الفكر و الفلسفة و الآليات اللتي ستؤدي إلى التغيير .. يعني أنا كل اللي أعرفه إن الدستور هيتغير و أعرف كمان إن 34 مادة منه اللي هيتغيروا لكن لا أعرف المواد و لا تغييرها هيكون إيه .. طيب فين مشاركة الشعب في صنع القرار .. بلاش صنع القرار .. المشاركة في التغيير حتى و نبقى عارفين هيحصل ايه